מיין טריפ/וואקאציע קיין ארלענדאו
מיין טריפ קיין ארלענדאו
בסייעתא דשמיא וועל איך פראבירן אביסל אראפשרייבן מיין נסיעה קיין ארלענדאו און בעזר ה' ארויסהעלפן מיט עצות און ריסארסעס פאר ווער עס וויל אויך פארן קיין ארלענדאו פלארידע.
זונטאג פארטאגס האב מיר זיך דערוועקט פון די קלינג פון די וועקער זייגער. א שנעלע חשבון האט געטענהט אזש מען ברויך שוין אויפשטיין נישט צו פארפאסן דעם פליגער.
גייענדיג אין בית המדרש האט מיר א מאדנע געפיל באנימען, ווען בין איך לעצטע מאל געוועהן אויף זונטאג פארטאגס?! לכאורה א' סליחות… אבער דאסמאל בין איך געוועהן פון די איינציגסטע אויף, חוץ נאך אפאר אידן וואס האבן נישט געוואלט פארפאסן זייערע פלייט.
נאך שחרית האט מען זיך תיכף ארויסגעלאזט צו לאגווארדיע לופטפעלד ווי מען האט קודם געפארקט דעם קאר ביים לאגווארדיע פלאזא האטעל, באשטעלט דורך way.com
נאך צוויי מינוט איז די שאטל געקומען און אונז אפגעטראגן צום עירפארט.
די שאטל פארט יעדער צוואנציג מינוט.
אנקומענדיג אין לופטפעלד סיינט מען זיך אריין דורך די עלעקטראנישע קיאסקן וואס ליגן אויסגעלייגט.
פון דארט זעמער גלייך צוגעגאנגן צו די ספיריט עירליין טישל ווי מען האט אריינגעגעבן די רענצל וואס האט געקאסט א נישטיגע הונדערטער פאר ביידע וועגן צוזאם.
זיי האבן מיר איבערגעגעבן דעם באורדינג פעסס און פון דארט איז מען געגאנגען צו סעקיוריטי.
ביי סעקיוריטי האט מען מיר באגנבעט מיין מעסערל וואס איז געליגן אין מיין טאשקע. שוין… גם זו לטובה…
ויסעו, די ערעפלאן האט זיך געהויבן און נאך בערך צוויי אהאלב שעה האט מען געלאנדעד ב"ה, ויחנו בארלענדאו.
ביים ארויסטרעטן פונעם עירפארט האט מען גלייך געשפירט די איינגענעמע ווארימע פלארידע לופט, ס'איז געוועהן בערך זיבעציג דעגרי… אההה מחיה…
אזוי ווי איך בין א פרעזידענט סערקול ליאלטי מעמבער בין איך תיכף צוגעגאנגן צו די הערטץ קאר רענטל געראדזש ווי איך קען מיר וועלן א קאר פון די פרעזידענט סערקול אפטיילונג.
נאכן נישט טרעפן דארט קיין לייטישע קאר האב איך זיך פשוט אריינגעזעצט און א שיינע מערצעדעס פון די ריזערוועד אפטיילונג און געזאגט א קאפיטעל תהילים און צוגעפארן צום עקזיט.
די מענטש דארט בעהט מיר מיין לייסענס, געבט מיר א ריסיפט און די ארויסגאנג שטעקעלע האט זיך ברייט געעפענט און פארענט פון מיין נאז, מיט א שמחה האט איך אראפ געדריקט די גאז און היידא… ס'איז פיין געלונגען…
פון דארט זעמער געפארן בערך א האלבע שעה צו די ארלענדאו אומגעגענט ווי איך וועל זיך אויפהאלטן די קומענדיגע פאר טאג.
אזויווי טשעק אין איז נישט געוועהן פאר דרייע נאכמיטאג בין איך קודם גיגאנגן צום גראסערי איינצוקויפן אביסל.
די גראסערי איז טאקע א גוישע סטאר, עס הייסט Win Dixie, אבער עס האט דריי קליינע אייעלס מיט כשרע פראדוקטן מיט היימישע הכשרים, ווי סנעקס, קרעקערס, טונע, מזונות, סאסעס און ספייסיס, קעטשופ און מאסטערד, געטראנקן, פעיפער גודס, וכו'.ווי אויך האבן זיי צוויי פרידזעס, פיל מיט מילכיגע און פליישיגע פראדוקטן מיט היימישע הכשרים, אריינגערעכנט דבש מילך חלב ישראל, יוגארטס און לעבענס, פוטער קרים טשזיס, ספרעדס, א קליינע אויסוואל פון פלייש אפי' בשר בהמה, קאלד קאטס, פרענקס, ווי אויך האבן זיי פראזען פראדוקטן ווי וואפעלס, פיצא, פלאפל, וכו' וכו', דערנאך קען מען קויפן פרוכט און גרינצייג און נאך זאכן וואס איך געדענק נישט.
געוויסע פשוטע זאכן האבן זיי נישט געהאט מיט א היימישע השגחה ווי למשל מייענעז און נארמאלע סיריעלס… קוקט אויס אז די עולם קויפט די גוישע קאמפעניס מיט די אלגעמיינע הכשרים…
ברויט איז אויך נישט געוועהן, נאר פארפאקטע חלות פון רייזמאנס.
המשך יבאו, (אויב די עולם איז אינטערעסירט...)
שכל הישר איז א טייערע ארטיקל...
