ובכן מה נהדר היה המראה... איז דער געשפרעך אין שטאט אומעטים, ווי מ'גייט און ווי מ'שטייט איז דער עולם אין די לופטען פון דעם געוואלדיגען תענוג רוחני מתוך שעה של קורת רוח וואס איז פארגעקומען דעם פארגאנגענעם מאנטאג פרשת שמות ע''י קהילת הקדושה חנוכת התורה מקילניץ אין דעם נייען בנין האדיר והגדול דביהמ''ד החדש
אזוי ווי דער טאג איז אויסגעקומען צו זיין ביום שרוב העם פנויים ממלאכתם האט די קהילת הקדושה חנוכת התורה מקילניץ צוגעשטעלט פאר'ן שטאט א יום שכולו תורה, אין דעם נייעם בנין האדיר הגדול דביהמ"ד החדש, ווי עס האבען זיך משתתף געווען א ריזען ציבור מסלתה ומשמנה פונ'ם שטאט, חשוב'ע אינגעלייט און בעלי בתים האבען זיך מתבשם געווען אין לימוד תוה''ק במקום קדוש ברוב עם יעדער איינער מיט זייערע חברותות קבועות לערענדיג מה שלבם חפץ, און בנוסף צו דעם איז פארגעקומען שיעורי תורה ברבים אין כל מכמוני התורה, ווי דער ברייט בארימטען שיעור כ''ג על הש''ס דורכ'ן מגי''ש המפורסם הרב הגאון מוה''ר נפתלי הירצקא גרינפעלד שליט''א ר''מ במתיבתא צאנז סטעטין איילענד, בעל מח''ס פלאות עדותיך עה''ת ומהדיר ועורך ספר פני יהושע על הש''ס, און וויאויך דער הערליכער שיעור בהלכות שבת במסגרת חבורת לומדי תורה ע''י הרה''ח ר' יושע ראזענבלום הי"ו וואס האט מקיף געווען אין בערך א האלבער שעה רוב הלכות השייכות למצות שמירת שבת בבחינת זכור וואס דער משנ''ב ברענגט ארויס אין זיין הקדמה, ועוד
דער בנין האדיר והגדול כשלעצמו וואס פארשפרעכט צו זיין דעם כלילת יופי משוש כל העיר, איז נאכנישט פולקאם פארענדיגט אין באניץ, מ'האלט נאך ביים אויסרישען די פינישינגס, די אבני שיש, וכדומה, נאר אזוי ווי דער בנין איז פריוויזאריש אויסגערישט געווארען עטליכע וואכען צוריק לכבוד די שמחת שבת שבע ברכות בבית רבינו די מרא דאתרא שליט"א, האט די הנהלת הקהילה באשלאסען אויסצו-ווארטען שוין אויף דעם יום שכולו תורה מיט די פריוואזארישע איינלייטונגען
דער טאג האט זיך אנגעהויבן מיט מניני שחרית פון זיבענע ביז בערך צענע עלעווע, בשעה ניין אזייגער האט מען אנגעהויבן סערווירען פת שחרית ביד רחבה, נארהאפטיג, רייך און עלעגאנט, צוגעשטעלט וואס מען קען נאר הערען און געדענקען, ווארימס און געבראטנענס, מיט א מייעסטעטישען ברייטקייט ברוח נדיבה, אראנזשיערט דורך דעם גבאי הנאמן הקהילה אשר באש ובמים וברוח סערה לא נח דורכצופירען וואס עס פעלט זיך אויס לטובת הקהילה והציבור, מוה''ר ר' שלמה ברוך בראדי הי''ו, תשועת חן חן לו, ואף הוא עומד לעומתם ומשמש מיט אן אויסטערלישען טריישאפט
ווי ברייט באקאנט איז דער מרא דאתרא הרה''ג רבי יחזקאל באב''ד שליט''א א שקדן מיט א מח נפלא וואס מ'זעהט זעלטען, און ממש כל רגע אניס ליה חזרט ער בעל פה בלעטער גמרא, ווי שיין איז געווען, מה נווי על ההורי''ם ווען אינגעלייט האבען זיך ארומגעזעצט און כאילו פארהערט דעם רב שליט"א אויף אויסעווייניג עטליכע מסכת, דער רב שליט"א האט גענפערט מיט א בהירות אין וועלכע מסכתא דער מימרא געפינט זיך, אויף וועלכן דף און עמוד, און ווי אויפ'ן עמוד, דער עולם איז ארויס פון התפעלות און שטוינונג ווי נהירא ליה שבילא מיט א געוואלדיגען קלארקייט, אשרינו שיש לנו רבינו כזה!
דער הויעכפונקט פונ'ם מעמד איז געווען דער דרשה המרכזית דורכ'ן בארימטען לעגענדארער מגיד שיעור הנפלא פה מפיק מרגליות הרה''ג ר' אברהם מרדכי מלאך שליט''א וואס האט מיט זיין אראטארישען קראפט און לשון לימודים הערליך ארויסגעברענגט דער ענין פון שובבי''ם מיט א בחינה פון מלך בשדה, הנהגת היחוד עפ''י הרמח''ל בספרו דעת תבונות, וואס האט מורא'דיג מחזק געווען און אנגעווארימט דעם עולם, אנגעפאנגען האט ער מיט זיין אייגענארטיגען סטיל, מיט א ניגון, א ימים נוראים'דיגן ניגון אן די ווערטער, כידוע דברי הרה''ק מאפטא זיעואכי''א אויף דעם טאג
אזוי ווי עס איז שוין געווען טיעף אין טאג האט מען זיך געשטעלט דאווענען מנחה ברוב עם, און דער עולם איז זיך צוגאנגען מלא מחוזק פון אזא אנגענעמען עונג רוחני, מתוך שעה של קורת רוח, אדער מיט א שווערע בענקעניש און מיט עניים צופיות, אריינצוגיין שוין בקביעות כאוות נפשינו, כשם שזכינו לסדר אותו, כן נזכה לברך על המוגמר, עד ביאת גוא''צ אמן