ראה מעשה ונזכר הלכה, כבוד ידידי הרב פארשלאפן האט מיר מזכה געווען מיטדעם קול קוראוואס איז ערשינען בשנת תשכ"ב איבער די אויפבויה פון א מקוה טהרה אין בארא-פארק, האב איך זיך דערטראכט אז מיר האבן נאכנישט דא קיין אכסניא פאר די היסטאריע פון בארא-פארק (מיר האבן אשכולות פאר ווילי, קראון הייטס, קרית יואל און אנדערע, ולמה נגרע).
איך הייב קודם אן טאקע מיט דעם דערמאנטע ליסטע פון רבנים וואס האבן געוואונט און זענען געווען אקטיוו אין בארא פארק אין די ערשטערע יארן פון די התיישבות פון חסידישע אידען אין בארא פארק, און שרייבען אונטער דעם קול קורא, ווער עס קען מוסיף זיין לתולדותם, און/אדער צושטעלן נאך רבנים צו די ליסטע, תבא עליו ברכה, ובכלל ווער עס קען מוסיף זיין איבער די היסטאריע פון אידען/חסידים אין בארא פארק וועט טאן א געפעליגקייט מיט אסאך אידען, וואס זענען נייגעריג דערוועגן, וזכות הרבנים תלוי בו.
1. ר' חיים מייזליש - סארוואש, דאס איז דער פאטער פון שאפראנער רב שליט"א, איז ער געגאנגען קיין בארא-פארק פאר זיין ברודער דער אויווארער רב? (ווי איז ר' שמחה?)
2. ר' אהרן דוד ווערטהיים - לינדען הייטס, ער איז געווען א בענדערער אייניקל, נישט איבערגעלאזט קיין קינדער (אין די צייטונג עטליכע וואכען צוריק איז געווען באשריבען די לינדען הייטס שול, אויב געדענק איך גוט איז אויך געווען דארט א בילד פון הרב ווערטהיים)
3. ר' יצחק קאפלמאן - שערי יושר, דאס איז דער באקאנטער לוצערנער ראש ישיבה זצ"ל ר' יצחק דוב קאפלמאן, ער האט מייסד גיווען די ישיבת שערי יושר אין ב"פ איידער ער איז אריבער קיין שווייץ, על שמו של רבו הגר"ש שקאפ בעמח"ס שער ישר.
4. ר' יצחק צבי וואלבערג - שומרי אמונה, באקאנט געווען אלס ר' הערשל וואלבערג, דער סאטמאר רבי בעל ברך משה זצ"ל האט אמאל שטארק מכבד געווען זיין פלימעניק ר' שמואל חיים וואלבערג פון קרית יואל, אלס הכרת הטוב וואס ר' הערשל האט געטאן מיט אים ווען ער האט זיך אריבערגעצויגען קיין ב"פ, מיט א שטארקע התקרבות, ר' הערשל האט נישט איבערגעלאזט קיינע קינדער רח"ל, יהא זכרו ברוך (זקיניך ויאמרו לך - די וואך כי תבא תשע"ב)
5. ר' צבי סטאלמאן - בית ישראל, ר' הערשל סטאללמאן איז געווען אן איידעם ביי ר' יצחק משה זילבערמאן אב"ד טאלעדא אהייו, הרב סטאלמאן איז נפטר געווארן בשנת תשמ"ז ונטמן בכפר סבא באר"י: http://kevarim.com/rabbi-yitzchok-moshe-silverman/
6. ר' שמחה עלבערג, דאס איז דער באקאנטער מו"ל פונעם ירחון הפרדס, ער האט דאס איבערגענומען פון ר' שמואל אהרן פרדס נכד אדמור"י בית סטאשוב.
וואס טוט זיך מיט הגאון רבי דוד זינגער זצ"ל רב דק"ק ספרדישע שול הגה"ץ רבי אלעזר טווערסקי זצ"ל האדמו"ר מפאלטישאן הגה"ץ רבי יוזפא פריעדלאנדער זצ"ל האדמו"ר מליסקא הגה"ץ רבי אברהם יהושע העשיל זצ"ל האדמו"ר מקאפיטשניץ
מיללער האט געשריבן:
1. ר' חיים מייזליש - סארוואש, דאס איז דער פאטער פון שאפראנער רב שליט"א, איז ער געגאנגען קיין בארא-פארק פאר זיין ברודער דער אויווארער רב? (ווי איז ר' שמחה?)
גערעכט. סארוואשער רב ז"ל איז געווען דא פארען אויווארער רב ז"ל. אונעם 'זכרונות פון רבין זי"ע' אשכול האב איך באשריבען א עפיזאד פון רבין זי"ע א שבת און באראפארק און ער איז איינגעשטאנען ביים סארוואשער רב ז"ל viewtopic.php?p=262347#p262347
אאוויא איך שרייב דארט, מיר האבען נאך געדאווענט ביים באטור רב ז"ל. אויווארער רב ז"ל האט נאך דענמאלטס געוואוינט און וויליאמסבורג.
אינעם ליסטע פון רבנים אינעם ערשטן תגובה ווערט דערמאנט ר' שמואל קלמן מירסקי דער רב פון יאנג איזראעל אין בארא פארק, ווי איז/געווען דער יאנג איזרעאל שוהל?
פראפעסאר דר. מירסקי איז געווען א באקאנטער חוקר און פראפעסאר אין ישיבה יוניבירסיטי, פון די פירנדע מזרחי פירער אין ניו יארק, ער האט זיך אויך פארנומען מיט אלטע כתבי ידות וואס ער האט מהדיר געווען, גאר באקאנט איז זיין ארבייט אויפן שאלתות דרב אחאי, ער האט אויך געשריבען דעם בוך מוסדות התורה בבנינם ובחורבנם, אסאך פון זיינע ווערק געפונען זיך אויף היברו בוקס, ער איז אוועק בשנת תשכ"ז.
עס איז מיר א שטיקל חידוש דער צוזאמענשטעל פון אזעלכע פרומע ערליכע רבנים ווי דער סארוואשער רב, דער באטורער רב אא"וו מיט פראפעסאר מירסקי, מסתם צייגט דאס אביסל אויפן מצב פון בארא פארק בימים ההם, ווי די מאדערן-ארטאדאקסישע קרייז האט נאך געהאט א שטארקען כח וואס האט פארלאנגט א צוזאמענארבייט מיט יענע קרייזען.
אדמו"רים: ר' שלמה שמואל מטשארנאביל ובנו ר' יעקב ישראל ר' יצחק מסקווירא ובנו ר' דוד'ל ר' מנחם נחום מסקווירא מאחנובקא ואחיו ר' יעקב יוסף מסקווירא ר' שלום יוסף מטוריסק-פראסקוראב ר' מאיר מקאזלאוו ובנו ר' משה ר' ישראל מבלאזוב ר' שלמה מבאבוב ר' מדעעש
רבנים: ר' משה צבי ארי' ביק ממעזבוז ר' משה שטערן מדעברעצין מוואוידסלאוו ר' שלום יחזקאל שרגא רובין-האלבערשטאם מציעשינוב
וועגן אדמורים-רבנים-ווייסע/שווארצע זאקן-שיפע טאשן אא"וו וואס באקרוינען די גאסן פון דער היינטיגע עיר ואם בישראל -בארא פארק הבירה, גלויב איך נישט אז ס'איז דאהי איינער פראהאן, וואס האט די מעגליכקייטן דאס ארויף צו קלאפן אין א תגובה..
מיללער האט געשריבן:
3. ר' יצחק קאפלמאן - שערי יושר, דאס איז דער באקאנטער לוצערנער ראש ישיבה זצ"ל ר' יצחק דוב קאפלמאן, ער האט מייסד גיווען די ישיבת שערי יושר אין ב"פ איידער ער איז אריבער קיין שווייץ, על שמו של רבו הגר"ש שקאפ בעמח"ס שער ישר.
רב קאפלמאן ז"ל בית מדרש איז געווען אויף 11 עוועניו צווישען 55 און 56 גאס. ווען רב קאפלמאן ז"ל האט זיך אריבער געצויגען קיין לוצערן און די שווייץ, האט דאס בית מדרש איבער גענומען ר' ארון ארי' קטן ז"ל אדמו"ר ממאניסטריטש
מיללער האט געשריבן:
5. ר' צבי סטאלמאן - בית ישראל, ר' הערשל סטאללמאן איז געווען אן איידעם ביי ר' יצחק משה זילבערמאן אב"ד טאלעדא אהייו, הרב סטאלמאן איז נפטר געווארן בשנת תשמ"ז ונטמן בכפר סבא באר"י: http://kevarim.com/rabbi-yitzchok-moshe-silverman/
דער בית ישראל שוהל איז אויף 11 עוועניו צווישען 56 און 57 גאס. איך האב נאך געדענקט רב סטולמאן פון דארט און איך פלעג גיין הערן זיינע דרשות.
נאך דעם וויא ער האט זיך אוועק געצויגען קיין א"י איז ר' פסחי' פריעד שליט"א געווען דארטען רב פאר א קורצע צייט, און דערנאך האבען זיי אויפגענומען ר' פסח קארב שליט"א, א שוואגער מיט ר' לייבעל ק"ץ שליט"א. רב פסח שליט"א איז רב און בית ישראל עד היום, שוין קרוב צו 30 יאהר.
מיללער האט געשריבן:
6. ר' שמחה עלבערג, דאס איז דער באקאנטער מו"ל פונעם ירחון הפרדס, ער האט דאס איבערגענומען פון ר' שמואל אהרן פרדס נכד אדמור"י בית סטאשוב.
ר' שמחה עלבערג ז"ל האט געוואוינט אויף 14 עוועניו און ער האט געדאווענט און די אגודה. זיין דף יומי שיעור איז געווען זייער מפורסם. ער איז געווען א תלמוד מובק פון הגאון ר' מנחם זעמבע זצ"ל הי"ד
רב עלבערג ז"ל איז דער מחבר פון ספר שלמי שמחה ה' חלקים על עניני קדשים. מעקען זיי טרעפען אויף היברובוקס