Re: בניני המוסדות: נייע בנינים און רענאוואציעס
וועלעכע בנין איז דעס?פרייליךשטענדיג האט געשריבן: ↑ מיטוואך מארטש 20, 2024 3:45 pm(סאטמאר מהר"יי)
אוהב ה' שערים המצויינים
נעכטן איז פארגעקומען אן אייגנארטיגע מסיבה בביתו פון הגה"צ אב"ד זענטא שליט"א, מיט די באטייליגונג פון א געקליבענע צאל חברי הנהלת המוסדות און עסקנים ובראשם כ"ק מרן רבינו שליט"א, לרגל וואס דער זענטער רב האט געשלאסן דעם מקח און אפגעקויפט אן הנצחה בתוככי מוסדותינו הק', דער הויפט שער אינעם פרי-וואן-עי בילדינג נעבן דעם גיגאנטישן בנין ברכה סימא. ויקרא שמה בישראל "שער ברכה סימא".
זכות אבות יגן עלינו
עס האט זיך דערביי אנטוויקלט א הערליכן שיינעם שמועס איבער'ן הייליגן זיידן הגה"ק בעל עצי חיים זי"ע והרבנית הצדיקת מרת ברכה סימא ע"ה. צווישן אנדערע האט דער רבי שליט"א מיט אחיו דער זענטער רב ארומגעשמועסט נאסטאלגישע זכרונות איבער די פעולות כבירים פון זייער פאטער מרן רבינו הגה"ק בעל ברך משה זי"ע, באהויפטנדיג אז מרן הברך משה איז געווען דער איניציאטאר פונעם רעיון איינצושטעלן א ישיבה לצעירים לבחורי חמד, איינזעענדיג די געוואלדיגע נחיצות און געברויך צו האבן נאך א מסגרת צווישן די ישיבה קטנה און די ישיבה גדולה, א זאך וואס איז היינט איינגעפירט אין די גאנצע אידישע ישיבה וועלט.
גדול המעשה והעושה
געעפענט דער מעמד האט הרה"ח ר' אהרן הערש פריינד הי"ו יו"ר וועד קרן הבנין, וועלכער האט ארויסגעברענגט די גרויסע חשיבות פאר הנהלת מוסדותינו הק', אז דער זענטער רב מחברי הנהלת המוסדות איז זוכה אפצוקויפן א 'זכות נצחי' אינערהאלב מוסדותינו הק', און וויפיל שבח והודי' מ'דארף אפגעבן פאר השי"ת אז מען איז זוכה צו אזא פריידיגע מאמענט. ארויסברענגענדיג לשבח ולתהילה די אלע יארן וואס דער זענטער רב איז עומד לנס, און איז א 'מעשה' צוצוהעלפן אויפטרייבן פאנטאסטישע סכומים פאר די מוסדות, אבער יעצט איז ער שוין אויך אליין איז ער שוין אויך אן 'עושה', און געגעבן אזא באדייטנדע הנצחה.
ביערת"י הקודש מן הבית
ר' אהרן הערש האט באזונדער ארויסגעהויבן דעם 'לא אנו תחילת הקדושה', מיט א פאסיגע מליצה 'ביערת"י הקודש' אז דער זענטער רב האט מקבל געווען דעם הייליגן פלאם פאר די מוסדות 'מן הבית', מבית אבותיו פון זיין גרויסן פאטער מרן רבינו הגה"ק בעל ברך משה זי"ע, וועלכער האט זינט ער איז ארויף על כס הרבנות למלא מקום דודו געהאט די זכי' להגדיל תורה ולהאדירה און מרחיב געווען די גבולי הקודשה פון די הייליגע מוסדות אויף א גאר פארצווייגטן פארנעם, אויפשטעלנדיג א לגיון של מלך פון רבבות אלפי תלמידים ותלמידות בליעה"ר וואס גייען אויפ'ן דרך הסלולה פון דודו מרן רבינו הקוה"ט זי"ע, און די זעלבע האט ער מקבל געווען דעם פלאקער פאר די מוסדות ביי זיין שווער אינדערהיים הרבני החסיד המפורסם רבי יוסף אשכנזי ז"ל, משב"ק ואיש אמונו פון רבי'ן זי"ע.
מתי יבוא לידי ואקיימנה
מיט א געשטיקט קול האט הגה"צ אב"ד זענטא שליט"א באגריסט די מסיבה מיט קורצע התרגשות'דיגע ווערטער זאגנדיג אז זייענדיג א חבר הנהלה קומט אים אסאך אויס מיטצוגיין צו נדיבים בעם וואס ביישטייערן זייערע נדבות לבם לטובת די מוסדות הק', און אלץ האט ער געטראכט מתי יבוא לידי ואקיימנה און ב"ה יעצט איז ער זוכה צו דעם. דער זענטער רב האט צוגעלייגט אז ער האפט בעזהשי"ת מוסיף צו זיין ברבות הימים כיד ה' הטובה עליו.
חתימת השטר וקנין זכות
דערנאך האט מרן רבינו שליט"א מיט אחיו הגה"צ מזענטא שליט"א אונטערגעשריבן דעם 'שטר קנין נצחי' וואס באשטעטיגט דעם מקח טוב אויפ'ן 'שער ברכה סימא', און דער זענטער רב האט אויפ'ן ארט אפגעגעבען א טשעק פון די גאנצע נדבה לידו פון אחיו רבינו שליט"א.
הנני יוסיף להפליא
אין א היסטארישן שריט האט מרן רבינו שליט"א זיך דערביי תיכף אויסגעדרוקט: ער וויל אויך האבן א חלק אין דעם הנצחה, און ער איז מוסיף מעשר אויף די 'נדבה נכבדה' וואס דער זענטער רב האט געגעבן...
מען האט דערנאך געטרונקען א לחיים און דער רבי שליט"א האט גאר ווארים אנגעוואונטשן פאר אחיו הגדול ער זאל ווייטער קענען זיין בייהילפיג לטובת מוסדותינו הק', בגוף ובממון. דערנאך האט מען זיך ארויסגעלאזט אין א טאנץ "ק-ה זכות אבות יגן עלינו" מתוך שבח והודאה להשי"ת, און געשלאסן דעם מעמד מיט גרויס התרגשות.
ופתח לנו 'שערי ברכה'
4c6255a1-eb06-4378-8765-8ed720f764a6.jpg
f6baf01e-d8b2-4440-bd03-1adb93cb11ea.jpg
4e634734-1014-46b5-a294-06c9dfa362b4.jpg