יישר כח כולל פאר דיין שיינע נדבה. זאלסט באקומען פון אלעם גיטן.
אייגנטלעך אפשר טוסטו עפעס אז לכאורה זאל זיך אינטעריאגן מיט די נסיעה דערציילונג? מיר האבן שוין געלערנט דיינע געשמאקע חזרות מיט ערשטע און צווייטע חברותא...
איוואנאוו'ס ארעסט האט געגעבן אנצוהערן אז שייגאו'ס איינפלוס איז שוין נישט שפיץ. און מעגליך זיין צייט איז נאנט. יעצט אז שייגאו איז ארויס איז צו ערווארטן אז נאך שייגאו לויאליסטן וועלן זיך טרעפן אינדרויסן אין די קומענדיגע שטיק צייט.
אפילו נישט שייגאו לויאליסטן, איך ערווארט אז א שיינע צאל חברה גייען זיך אינדרויסן און דער נייער קריגס מיניסטער בעלאסאוו וועט פרובירן צו באזייטיגן קארופטירטע און ביוראקראטישע זעצערס וואס שטערן די פליסיגקייט און פלעקסעביליטי פון די קריגס מיניסטעריום.
עס איז שטארק מעגליך אז דאס ארויסריקן שייגאו פון אמט איז אויך פארבינדן מיט די נאכאנאנדע מאכט געראנגל וואס קומט פאר אין דיקטאטורישע רעזשימען און ספעציפיש וויאזוי פוטינס צירקל אפערירט. די שטילע קאמפן צווישן די עליטיסטן.
לאמיר אויסטון די פשוט'ע ברילן און לאמיר אנטון ברילן צו באאבאכטן א מאפיא פאמיליע. פוטין קאנטראלירט די עליטע דורך "צוטייל און הערש" טאקטיק. "דיווייד ענד רול" איז נישט קיין נייע מיטל. פוטין האט אלע יארן קאנטראלירט זיינע נאנטסטע מיט די מהלך. דער ביים שיסל צוטיילט די וואס זענען אינטער אים. די גרויסע קעפ דערקוטשענען זיך איינער דער צווייטער און קיינער שלאפט נישט רואיג און קיינער איז נישט געניג זיכער מיט זיך. קיינער איז נישט פאראייניגט צו מסדר זיין די ביג באס. דער ביג באס פארמאגט די אלטימעט מאכט און ווען איינער איז צו שטארק איבער דער אנדערע און דער צווייטער שפירט זיך באדרויעט קומט דער "באס" און גלייכט עס אויס. יעדער מוז צוקומען צו די ביג באס. יעדער פרובירט צו ווייזן לויאליטעט צום באס מיט ווייזן ווי נאנט און געטריי ער איז איבער דער אפאנענט.
קריגס מיניסטער סערגעי שייגאו איז זיך נישט דורכגעקומען מיט סערגעי כעמעזאוו דער פירער פון די מאכטפולע ראסטעק אימפעריע וואס איז די גרעסטע אינדוסטריאלע סעקטאר פאר די רוסישע קריגס מאשין. און אזוי אויך מיטן דעפיוטי פרעמיער מיניסטער דעניס מאנטיוראוו וואס איז דער אינדוסטריע מיניסטער. זיי האבן א גרויסער איינפלוס און מאכט אין די רעגירונג, ספעציפיש יעצט ווען די ראסטעק אימפעריע שפילט א קריטישער ראלע אין סופלייען די רוסישער קריגס מאשין. שייגאו מיט די קריגס מיניסטעריום אלץ קליענט און כעמעזאוו אלץ פארקויפער האבן זיך נישט געזען אויג אויף אויג און זאכן זענען נישט געפארן געשמירט.
פוטין האט למעשה נישט געווארפן שייגאו ווי א הינט. פוטין האט באזייטיגט שייגאו מיט זיידענע הענטשוך און ארויסבאגלייט שייגאו פארהעלטנמעסיג בדרך כבוד. קודם ער האט אים נאך געלאזט אנפירן די גרויסע פאראדע פאריגער וואך, וואס קומט פאר יערליך מאי דעם 9'טען צו אפצייכענען די זיג אנטקעגן די פאשיסטישער אקס אין 1945. און בעיקר אז פוטין האט צוגעטיילט פאר שייגאו א צווייטער מאכטפולע פאזיציע. די פאזיציע צו פירן די זיכערהייַט קאנסיל. א פאזיציע וואס איז ביז יעצט געפירט געווארן דורך ניקאליי פעטראשעוו.
די פאזיציע איז דורכאויס די לעצטערע יארן געווען גאר מאכטפול און געװיסע קלערן אז מיט די פאזיציע איז גאר שייגאו געהויבן געווארן אין ראנג.
למעשה איז עס נישט אזוי. די פאזיציע איז נישט קיין גאר גרויסע מאכט אויף די ביכער. די מאכטפולקייט פון די פאזיציע איז געווען אז ניקאליי פעטראשעוו איז געזיצן פאר 15-20 יאר אויף די פאזיציע.
דער מיליטאנטישער פעטראשעוו, קען מען זאגן איז פון, צו גאר די מאכטפולסטע פיגור אין רוסלאנד נאך פרעזידענט פוטין. עכ"פ ביז נעכטן.
פעטראשעוו האט יארן לאנג געדינט אלץ די שפיאנאזש שעף פון די רוסישער ענקעוועדא אגענטור ווי ער האט אנגעקניפט באציאונגען מיט דער געוועזענער ענקעוועדא אגענט וולאדימיר פוטין.
יעצט אלץ שעף פון די זיכערהייט קאונסיל, טראץ וואס די פאזיציע איז נישט ווער ווייסט וואס עפעס מעכטיג, האט פעטראשעוו פאקטיש געטון פיל מער פון וויפיל די פאזיציע דעסקריפציע שטעלט פאר.
פוטין איז נישט דער צדיק, זאל מען זיך נישט איינרעדן אין ווילדסטע חלום. דער מערדער פוטין לעבט שוין יארן אין זיין אייגן באבל. אבער פון פוטינס לאנגווייליגע היסטאריע לעקציעס, פאר דער וואס הערט זיינע רעדעס, זעט מען אז פוטין מיט זיין פארדרייטע היסטאריע געשיכטעס האלט שוין לאנג אז אוקריינע טאר נישט עקזיסטירן און אנדערע פארדרייטע פאקטן. אבער די מער עקסטרעמיסטישע קאנספיראציעס איבער די מערב וועלט וואס ארבעט באהאלטענערהייט צו אונטערדרוקן רוסלאנד און וויאזוי די בייזוויליגע פלענער פון די מערב וועלט שונאים ארבעט קעגן מאמע רוסלאנד ווי מען סודות'ט זיך פון איין אדמיניסטראציע צו די קומענדיגע און יעדער מערב וועלט פירער ארבעט ווייטער אויף די טייוולאנישע פלענער... דאס איז מער פעטראשעוו סטיל. די געדאנקענגאנג לויפט אין פעטראשעוו און דאס האט אן קיין ספק געהאט אן איינפלוס אויף פוטין דורכאויס די לעצטערע יארן, לויט מומחים איבער די נושא.
געוועזענער שעף פון די זיכערהייַט קאנסיל ניקאליי פעטראשעוו
20240514_122633.jpg (274.95 KiB) געזען 2226 מאל
צו וועט שייגאו ערפילן די אומאפיציעלע פונקציעס פון פעטראשעוו יעצט אז שייגאו איז שעף פון די זיכערהייט קאנסיל?
עס בלייבט איבער צו זען אבער איז בכלל נישט מוכרח. די זיכערהייט קאנסיל איז מעגליך א שיינע וועג צו האלטן שייגאו נעבן זיך אנשטאט ווארפן צו די הינט אבער נאכאלץ אראפגענומען פון זיין איינפלוס. די פראגע איז ווי גייט פעטראשעוו פון דא און ווייטער?
שייגאו איז באמת א נאטירליכע פריינט צו פוטין. זיי וועלן שפאנצירן צוזאמען, גיין אין די סיבירישע וועלדער אויפן יאגד צוזאמען און קלויבן טרויבן אינאיינעם.
פעטראשעוו איז א פריינט צו פוטין בעיקר ווייל די פונקציעס וואס פעטראשעוו האט געטון האט אים געברענגט גאר נאנט מיט דארפן רעדן צו פוטין יעדען טאג. לכאורה מער פון סיי וועמען אין רוסלאנד. טא, יעצט אז די פונקציעס ווערן אוועקגעלייגט אין א זייט, מעגליך ער וועט צוביסלעכווייז נאטירלעך ווערן מער און מער אפגעריקט פון פוטין.
פארט, איז שווער צו זען אז פעטראשעוו נאך צוואנציג יאר זאל ווערן א גארנישט. וועלכע פאזיציע גייט פעטראשעוו באקומען? עס איז דערווייל נישט קלאר. צו ער גייט אוועקשטעלן א נייע סארט פאזיציע פאר אים צו אן עקזיסטירנדע פאזיציע. שווער צו גלייבן אז פוטין וועט אים געבן א סענאט זיץ צו א צווייטער לאנגווייליגע פאזיציע וואס דינט צו פענסיאנירן בדרך כבוד. אפי' פוטין וועט צוטיילן פעטראשעוו א קלענערע פאזיציע איז עס בכלל נישט מוכרח אז פעטראשעוו איז אראפ פון די מאפע.
אין רוסלאנד, אנדערש ווי אין אמעריקע, איז די אפיציעלע טיטל פון א פּאָסטן בכלל נישט אייביג געבינדן מיט די פליכטן און אויפגאבעס וואס די ארבעט דעסקריפציע שטעלט פאר. ער קען זיין א מיניסטער פאר אינפראסטרוקטור און נאכאלץ קענען שפילן א ראלע איבער אויסערליכע איינגעלעגענהייטן מיט א דירעקטע פארבינדונג איבער די קריג און איבער די מערב וועלט.
די יעצטיגע סטעיטמענט פון די קרעמלין איז אז געראסימאוו בלייבט אויף זיין פאזיציע. דאס אז די קרעמלין זאגט יא מאכט מיר טאקע טראכטן אז געראסימאוו גייט פליען...
