לעשות נקמה - בגוים
ברוכים הבאים!
נישט צווישן אידן גערעדט לעבן מיר אין א קאמפליצירטע וועלט וואס האלט נאך בעפאר איר תיקון און זינט איר באשאף איז זי די הויפטקווארטיר צו קריגן און צאנקערייען פון אימפעריעס און לענדער ביז פאמיליעס און אינדיווידועלן איבער פארלוירענע טעריטאריע אדער געטשעפטע עגא און אלעס אינדערמיט
די גלוסט צו נקמה איז א געפיל אינסטאלירט אינעם מענטש וואס פארזיסט גאר שטארק כאטש אויף צייטווייליג די בהמה'ישע אינסטינקט און באטראפענע און אנגעווייטאגטע באנוצן זיך דערמיט שוין פאר טויזנטער יארן
טעכנאלאגיע האט געברענגט די וועלט צו א מער פארגעשריטענע פלאץ אין פילע תחומים אבער די רייץ צו מאכן טאנצן עימיצער פון וועם מען איז געווארן בא'עוולה'ט איז געבליבן פרימיטיוו און מענטשן זענען גרייט זיך צו באנוצן מיט אור אלטע טאקטיקן זיכער צו מאכן אז זייערע פיינט באקומען זייער פארדינטע לעקציע
די אפעטיט אנצולערנען מענטשן דורך שפיצלעך און אינטריגעס ווערט בלויז שטארקער מיט דעם וואס געמיינדעס זענען מער סאציאליזירט און מענטשן מיט ווייניג אינהאלט און איבריג צייט זענען אויסגעהונגערט צו זעהן יענעם פארלוירן און אויסגעשפילט
פאר אונז אידן איז עס פארבאטן און נישט רעלעוואנט אבער אין חודש אדר איז מעגליך ערלויבט צו כאפן א שטיקל בליק אויף די צודרייטע וועלט און שמייכלען פון עטליכע ביישפילן וואס מענטשן פארציילן פון אייגענע ערפארונג ווי אזוי זיי האבן פרובירט צו שטילן זייער נקמה דורשט
די קורצע געשיכטעלעך ווערן באגלייט מיט בילדער אבער בלויז דארט וואו עס איז געווען פאסיג און אויסגעהאלטן און מען וועט עס פרובירן צו האלטן קורץ נישט צו באלמוטשען די ליינער צופיל
מען נעמט זיך נישט אונטער צו גרייכן צו 40 (איינס פאר יעדע טויזנט תגובות..) אבער אנהויבן קען מען און אויב עס וועט זיין מעגליך וועלן אין די קומענדיגע טעג ארויפגיין נאך
ביטע געדענקן אז די עפיזאדן זענען בלויז געמאכט צו ליינען און נישט נאכצוטוהן און אויב איר געפונט זיך איצט אין סענסיטיווע צייטן און אין אנגעצויגענע באציאונגען מיט אנדערע ביטע אויסווארטן עד יעבור זעם
מיר אידישע קינדער וועלן פארזעצן צו נוצן אונזער פארמאט פון נקמה מיטן איבערלעבן היטלער ימ"ש און אנדערע וועלכע זוכן אונז צו פארלענדן אלס ערליכע אידישע קינדער און מען קוקט ארויס זוכה צו זיין אינגיכן צום ודם עבדיו יקום ונקם ישיב לצריו און אז דער רב את ריבנו זאל זיין נוקם את נקמתינו און מען זאל דערלעבן די לעשות נקמה בגוים פשוט פשט
א פרייליכן פורים און א שמחת תמיד!
