אידישע וועלט פארומס

לכבוד יום טוב פסח הבעל”ט, וואו מיר דערמאנען ביי די הגדה, דעם חכם, רשע, תם, שאינו יודע לשאול, וועלן מיר ארומרעדן אין די מעלה פון תמימותוואס ברענגט דעם מענטש צו די העכסטע מדריגות! ווי מען וועט ברענגען פון די ספרים הקדושים, לאמיר זיך גרייטן מיט שמחה און אהבה צום גרויסן הייליגן נאכט ווען אונז גייען זוכה זיין צו אראפברענגען אלע הייליגע השפעות ברוחניות ובגשמיות אויף אונז לנו ולכל ישראל אמן, און ווערן נענטער צום גרויסן באשעפער און זיך מדבק זיין אין זיינע דרכים וואס ער איז הצור תמים פעלו.

דער הייליגער בעל שם טוב זי”ע האט געזאגט: ”נאך אלע מיינע השגות, בין איך א נאר און גלייב!”

אין ספר הק’ מאור עיניים פרשת חיי שרה, זאגט ער א מורא’דיגע פשט אינעם פסוק ’’תמים תהיה עם ה’ אלוקיך’’, וויאזוי קען מען ווערן א תמים? דורך עם ה’ אלוקיך אז מען איז דבוק אינעם אייבערשטן און אין זיין תורה.

אין ספה”ק כד הקמח פונעם רבינו בחיי שרייבט ער: "והנה מידת התמימות מעלה גדולה באדם ושורש עצום לכל שאר המידות החמודות, והיא מידה נזכרת אצל אבות העולם והנביאים והצדיקים, והיא מכלל המידות אשר בהם יזכה האדם לגור באהלו של מקום ולשכון בהר קדשו". (כד הקמח, אמונה)

אין ספה”ק ליקוטי מוהר”ן ח”ב סימן מ”ד: ”ובאמת, אחר כל החכמות, אפלו מי שיודע חכמות באמת, אחר כל החכמות צריך להשליך כל החכמות ולעבד את ה' בתמימות בפשיטות גמור בלי שום חכמות. וזה היא החכמה הגדולה שבכל החכמות, לבלי להיות חכם כלל. כי באמת אין חכם בעולם כלל, 'ואין חכמה ואין תבונה נגדו יתברך' (משלי כ"א). והעקר הוא, כי 'רחמנא לבא בעי' (סנהדרין קו: זהר תצא דף רפא:)”

דער הייליגער רש”ב זי”ע האט מסביר געווען אז תמימות בעבודת השם מיינט ערנסקייט. ווי עס שטייט ביי אברהם אבינו ”ומצאת את לבבו נאמן לפניך”.

און כ’וועל ענדיגן מיט די באוואוסטע הייליגע ווערטער פונעם הייליגן רבי רבי אלימלך זי”ע אויף די צדיקים וואס פירן זיך בתמימות. זאל דער באשעפער העלפן אז אונז זאלן זוכה זיין צו די הויעכע מדרגה פון תמימות!

הרה''ק מראפשיץ זי''ע האט געזאגט 'מ'דארף זיין זייער קלוג און שארף כדי צו קענען מקיים זיין דעם 'תמים תהיה עם ה' א-לקיך''