ס'איז קאלט דא, מיר דארפן א היטער.
מוצאי שבת קודש – מיטל נאכט שמחת תורה אין אמעריקע איז כלל ישראל צעטרייסלט געווארן ביז גאר, איינער איז געוואויר געווארן פריער און איינער שפעטער, אבער אויף מוצאי יו"ט האט זיך אנטפלעקט א שרעקליכער בילד, 700 אידן (נאך איידער איינער האט גע'חלומ'ט אז די נומער וועט זיך טאפלען און עס וועט ניטאמאל רעכט א ציפ געבן... ליידער) זענען ברוטאל ערמארדעט געווארן און א קאארדינירטע און אויספלאנירטער אטאקע דורך כאמאס.
די פאליטישע וועלט האט זיך שטארק ארויסגעשטעלט אין שטיצע פון מדנ"י, אריבער 100 פון די אומגעקומענע זענען געווען אויסלענדישע, ווי אויך האט כאמאס זייענדיג אזוי פארטעמפט פון זייערע מעשי רציחה נישט געשפירט פאר וויכטיג צו באהאלטן די גאנצע שוידערליכער אמת איבער די רציחות, און די וועלט איז געווען ערשטוינט, די מדנ"י פאליטיקאנטן האבן גערופן פאר נקמה, און זינט דאן איז די מדינה אין קריגס צושטאנד, מיט שווערע טויזנטער פאטאליטעטן אויף כאמאס' זייט, און דערווייל זעט מען נישט קיין ענדע אינעם נאנטן צוקונפט.
אין די אידישע וועלט – און יא, אויך דא אויף די אידישע וועלט – איז זעלבסטפארשטענדליך אנגענומען געווארן די צד קעגן כאמאס, אבער דערמיט ליידער אויך באהאלטענערהייט די זייט פון די מדינה, פלוצלונג האט מען געקענט אנהייבן הערן ווערטער און מיינונגען כאילו די מדינה דארף אהער, די מדינה דארף אהין, די מדינה מעג, די מדינה מוז, א.א.וו.
יא, כאמאס איז אייסיס, אבער די מדינה איז דאך היטלער! יא, גדול המחטיאו יותר מן ההרגו, ווי מעג מען און ווי קען מען רופן פאר די הצלחה פון א מדינה וואס איז נגד התורה? א מדינה וואס איר עקזיסטענץ באשטייט פון כפירה במלכות שמים ובביאת הגואל? און יא, אפילו אויב איר רופט דאס נישט בפה, אבער אויב דאס איז די מיינונג און געפיל ביי אייך אין הארץ איז עס א גרויסער פראבלעם!
יא, מיר זענען ליידער אפגעקילט געווארן, די הייליגע רגש דקדושה איז קאלט געווארן, די פלאמעדיגע שנאה, די תכלית שנאה שנאתים לאויבים היו לי איז פארלאשן געווארן, אבער פארוואס? ווייל מען פירט זיך אנטבלויזט, מען האט מורא אז אויב די מדינת ישראל מיליטער וועט אוועקגיין וועט זיין א מאסן מארד, מען דארף א שומר, א היטער, איינער זאל אונז אפהיטן, און ליידער ליידער פארלאזט מען זיך אויף די טמא'נע ציוני'סטישע מיליטער.
יא, מיר זענען קאלט געווארן, מיר דארפן א היטער, שומר ישראל שמור שארית ישראל, ואל יאבד ישראל האומרים שמע ישראל.
לאמיר אינזין האבן און זיך פארלאזן אויפן אמת'ער שומר ישראל.